وصفة عمل برجر الدجاج

أسهل وصفة لعمل برجر الدجاج

المقادير لعمل برجر الدجاج :

المرحلة الاول :

نصف كيلو دجاج مفروم ناعم. عدد واحد بيضة و نص كوب بقسماط ناعم و بصلة كبيرة مفرومة ناعمة و البهارات الي تحبيها انا استخدمت :

(شطة و فلفل أسود و كزبرة ناشفة و كمون ناشف و قرفة و جنزبيل مطحون و ملح حسب الرغبة )

ببساطة كل المكونات مع بعض بالشكل ده ونسيت اقولكم اضفت فصين ثوم لو حتلاحظي فوق البصل نلبس جوتني وندمج كل ده مع بعض بشكل كويس جدا جدا
وده الشكل النهائي نغطيها ونحفظها في الثلاجة لمدة ساعة ترتاح والبهارات تندمج بشكل كويس فيها.

نطلعها من الثلاجة نبندأ نفردها بين ورقتين زبدة وهنا السماكة المطلوبة بارتفاع 1سم بالكتير ونقطعها دوائر او اشكال للنجاتس زي ما تحبي وده شكلها مظبوطة ماشاء الله والسبب اني بعد ما فردت الخليط دخلته الفريزر لمدة نص ساعة وكمان قطعه بقطاعة حديد او استانلس مش بلاستك علشان الزايا تكون حادة ومظبوطة زي ما انتي شايفة .

نبدأ نجمد البرجر ونحطي قطع ورق زبدة بين كل وحدة والتانية منعاً للإلتصاق كل ما تاخدي وقتك في الخطوات النتيجة حتكون مظبوطة اكتر . لاحظي الارتفاع واحد ونفس الشيء بالنسبة لقطع الناجتس انا هنا عملتهم على شكل قلوب

المرحلة الثانية :

وهي التغطية بنفس فكرة البانية بس بدون دقيق.

طبعاً ممكن تكتفي بالخطوة السابقة وتستخدمي البرجر عادي لكن الخطوة الجاية دلوقتي وهي التغطية بتفرق جامد في الشكل النهائي والنكهة كمان بتخلي البرجر بالظبط زي الجاهز . وسوف نحتاج إلى بيض وبقسماط فقط ومعلومة سريعة يا بنات يفضل في الخطوة دي استخدام بقسماط معمول من العيش الشامي الرفيع المتحمص النتيجة بتكون كرسبي اكتر والذ اكتر من البسقماط الناعم الي بيكون معمول من الفينو وحتلاظي في الصور الجاية شكل وقوام البقسماط الي استخدمته .

هنا بطلع البرجر وقطع الناجتس من الفريزر وبتكون اتجمدت بشكل كويس جداً وبغطيها بالبيض وممكن تبهري البيض بملح وفلفل لو تحبي وبعد كدة على البقسماط .

هنا أول دفعة من البرجر والناجتس خلصو وبرجع اجمدهم وبعد كدة اوزعهم في اكياس او علبة زي ما تحبي وبيكون جاهز للاستخدام.

حنقلي منهم للتجربة

طعمها لذيذ جدا جدا ومقرمشة وكرسبي من برى اكتر من البانية والسبب نوع البقسماط وهنا الشكل النهائي للبرجر بعد القلي النتيجة بالظبط زي البرجر الجاهز الشكل من قريب.